বাচ্চা বেলা


সুকুমার বর্মন
বাচ্চা বেলাত শুলটি বাড়িত খেলাছি নুকা-টুক 
ঠাউমার মুখোত ঘোং শুনিয়া কাপিছে জালা বুক। 

বাউকচা বাড়িত ভাত আন্দা খেলাছি জোটো হয়া 
পূজার সমায় কান্দা কাটি  নাগিছে জামা নয়া। 

খুটার গাড়ি বানেয়া টানি, কত উবাছি মাটির মাল 
ডাবরি বাড়িত বাহ দিছি বানেয়া গামছার জাল। 

হাইলচা ধরি বসিয়া কত খেলাছি কপাল টোকা 
পড়া না পায়া কানমুচুরি খাছি নাইযে নেকাজোকা।

ভূরিপিট্টা খেলেয়া হছি ধূলাতে ন্যাটের প্যাটের 
আবোক কছি ডাকনীবুড়ি শুনিয়া ক্যাটের ম্যাটের।
 
কোনবা দিন ডিঘি পাউকচি  করিছি চখু নাল 
টোপলা ধরি নিগাছি খাবার বাপ জুরিছে যেঠে হাল। 

চুপ করিয়া ডোগা ডুগী খেলাছি জমুরা গাছত 
নাট্টাউ করি বেড়ের গেছি, ঠাকুরদার পাছত। 

ভাল্ ভাল্ গুড্ডি বানাছি বগলার আটা দিয়া 
গয়ো বানেয়া গুটি খেলাছি প্যাটত ভোগ নিয়া। 

চৌখের আগালোত দিনলা সদায় ভাসি উঠে 
বাচ্চা বেলার সাথীলা মোর আছে যে এলা কোঠে?

Post a Comment

Previous Post Next Post